咖啡渣唔係垃圾！ 識用其實好好用

古語有云，個個都飲咖啡，唔通個個都想飲咖啡咩？其實唔想飲都唔緊要，大家應該聽過咖啡渣係超有用，今日就簡介一下佢嘅用途，大家俾個機會呢啲渣滓貢獻社會啦！

1. 吸濕、除臭好幫手

將曬乾嘅咖啡渣（用微波爐叮可以加速）放入雪櫃、鞋櫃、廁所等等，可以輕鬆除怪味。而且咖啡渣有吸水能力，放喺鞋櫃仲可以保持乾燥。如果垃圾桶唔想即日清，可以灑一層咖啡渣上桶入面啲垃圾面，可以抑制異味產生。

2. 咖啡香氛

有人會自製咖啡香薰，喺香薰燈原本放精油同水嘅位置，改放咖啡渣，用蠟燭加熱就可以令空間滿布咖啡香，唔飲都可以聞吓。

3. 通渠

鋅盤、洗手盤去水慢，屋企又冇「Ｘ渠佬」或者通渠水，可以試吓將小量咖啡渣加啲清潔劑，連同一大壺熱水，倒入去水位，就可以令水管暢通。

4. 施肥驅蟲

咖啡渣會降低泥土嘅PH值，令啲泥變成偏酸，適合杜鵑、士多啤利一類鍾意酸性嘅植物。蚊蠅同蝸牛唔喜歡咖啡味，只要喺泥面撒一啲咖啡渣，就有驅蟲效果。

5. 狗隻除蚤

有養狗嘅朋友分享，原來只要同狗仔沖涼時，用啲咖啡渣幫佢捽吓，再用清水洗乾淨，就可以有除蚤效果。但千祈唔好俾狗狗食到咖啡渣，因為咖啡因係對狗隻有害嘅。